洗車
講起洗車，話難其實唔難，不過要玩到精就真係路途遙遠。而呢一篇只係合好似我呢 d 超新手睇。
DIY 洗車主要可以分做 3 個方法:
A) 有水源式洗車
B) 免沖洗車 (rinseless)
C) 免水洗車 (waterless)
A) 有水源式洗車
呢個方法比較適合係易拎水既情況下用，方式包括有人就咁成桶水淋，用水喉沖或用洗車機等等
- 首先用水沖走車身上大部份既塵。
- 上洗車液，我慣左等 1 分鐘等佢溶同浮左 d 污垢先開始用洗車手套抹，用洗車手套好處係比洗車海綿無咁易刮花車，因為洗車海綿同毛巾都係平面，污垢物比較易番刮花車身。亦有好勤洗車既人架車本身都乾淨，上完洗車液就等佢 5 分鐘抹都唔抹就直接過水。
- 過水沖乾淨。
- 抹乾，而抹車身既毛巾同抹車轆附近位既毛巾最好分開。
- 有 d 比較難抹既位亦有人會用手提風槍吹 d 水出黎。
- 之後做泥膠/上蠟等等就按個人需要。
用呢個方法你需要既基本物品有: 水喉 + 水槍頭，水桶開泡泡水 or 泡泡壺，洗車水，洗車手套，吸水毛巾
B) 免沖洗車 (rinseless)
免沖洗車同兩桶水洗車法係密不可分，而兩桶水洗車法之前已經有 post 過: 兩桶水洗車法
C) 免水洗車 (waterless)
免水洗車就最簡單，基本大原則就係拎住支免水洗車液一噴一抹，適合唔方便拎水既人使用。就算有水源洗車，好多人 (包括我) 都會係 2 次大洗之間用免水洗車抹下，會 keep 得好好多，特別係落完雨或者冬天唔願成日正式洗車個陣。而我有幾個小 tips 會令免水洗車變得更可行又無咁易刮花車。
- 要預備多 d 毛巾替換，建議最少 5 – 6 條。如果 budget ok 當然買靚毛巾用效果最好。但如果 budget 有限，就情願買 5 – 6 條平平地既毛巾換得密，都好過買一條靚野抹全車。
- 可以既話，係屋企裝定 2 大支水做免水洗車前用水淋一淋，雖然同免水呢個 concept 有 d 違背，但都係其中一個減少抹花車而又易做既方法。
- 每 2 – 3 個月拎出去比洗車屋大洗 (係講真係有水喉射個 d)，然後自己每星期 1 – 2 次抹車，用得多就勤少少抹，反正需時不長。
- 落左雨個日最好就抹，d 塵會無咁易痴係車身。
- 勤用免水洗車既人，絕對應該買一支濃縮裝免水洗車液 + 一個噴壺，一支可以開成十幾廿支除返條數其實好抵。
至於洗鈴，內籠清潔等等又係另外一個 topic 了。
廣告時間: 上面所有野本店都有賣 🙂
